政情：公民講場：劉秀成寸城大 塌頂低級錯誤

城市大學運動中心塌綠化屋頂事故，引起全城關注綠化天台承重及安全問題。前立法會議員、港大建築系名譽教授劉秀成尋日出席一個電台節目時話，城大運動中心屋頂屬於大跨度結構，物料較輕，主要靠四面牆支撐屋頂，所以唔可以額外承重，寸爆城大加建綠化天台係低層次錯誤。劉秀成解釋，中小學嘅綠化天台面積較小，多數用石屎建成，較城大運動中心嘅鋼架天台穩陣。佢又話，任何改動都應該根據專業意見向屋宇署入則，而屋宇署有紀錄，較清楚每幢建築物設計時嘅承重量。