政情：再流出臉貼臉相 翁繼文終認衰
由「爆粗大狀」馬恩國任團長的中澳法學交流基金會「一帶一路」訪京團爆出夜蒲攬女醜聞，涉事嘅翁繼文前晚發表聲明，死撐無同女士有任何親密行為，但本報尋日取得嘅一張獨家照片，就揭露佢同女士「摸杯底臉貼臉」嘅親密照。
本報取得翁繼文同佘英輝訪京夜蒲KTV嘅照片，當中除咗有翁繼文同女士嘅貼頭照之外，仲有一張最新照片，就係佢同女士手握酒杯，佢個頭貼咗落女士半塊臉咁滯嘅「臉貼臉」合照，同之前流出佢同女士貼頭照，明顯更加親密。翁繼文前晚發出聲明，再三強調去KTV無任何越軌行為，又話同佢合照嘅女士，雙方無任何親密行為，點知尋日就爆出「摸杯底臉貼臉」親密照，真係自打嘴巴。
fb貼道歉聲明
喺爆出新嘅親密照後，翁繼文尋晚近八時喺fb上載「深切反思‧致誠聲明」，指自己低估事件、政治敏感度不足，事件讓佢深切反思社會對參與公共服務人士嘅要求，對於受事件影響嘅家人、親友同團體表達歉意，對香港童軍總會、交通安全會及國際警察協會香港分會致歉。