政情：姚松炎嘆組「綠黨」 時機未到
外國唔少地方都會有綠黨（綠色政黨），即係主力推動綠色環保政策嘅政黨，但香港一直只有環保團體，無乜人想過籌組綠黨。
一直關注發展及保育議題嘅中文大學未來城市研究所副所長姚松炎話，佢與同樣關注發展規劃議題嘅土地正義聯盟朱凱迪，都有諗過成立類似綠黨嘅政治組織，推動環保議題，佢發現市民都係較為關注民生以至經濟議題，所以認為依家仲未有基礎組黨，希望假以時日有機會。
姚松炎話，一直有同各泛民政黨、傘後組織等合作，並承認有政黨中人向佢招手，但佢都一一婉拒，似乎佢一心一意想自組綠黨喎。佢打算由學界走入政界，希望令政界有訓練、前途以至階梯，等最叻嘅人由細就進入政界訓練成政治人才。