政情：李國章追卿姐 講金唔講心
立法會議員劉慧卿（卿姐）去年曾邀請香港大學校委會主席李國章出席其網台節目，當時李國章表示擇個日子，但之後一直未成事，直到尋日兩人終於聚首，清談半個鐘。對於有人就早前港大副校長任命風波提出司法覆核，李國章相信案件排期至本年底審理，好高興到時有機會公開校委會會議內容，就可以還佢一個清白。至於卿姐亦爆料，指李國章廿年前曾追佢十五條街，原來係申訴政府撥款不公平。
李國章上到卿姐網台節目，一開始兩人就談笑風生，卿姐指呢個訪問約咗好多個月終於成事，又指李國章好配合，無托手（月爭），而本身喉嚨痛嘅李國章食住喉糖都幫手，認真難得。卿姐喺節目中爆料，指廿年前第一次見李國章，對方已經追佢十五條街，並非追女仔，而是大呻政府對中大和威爾斯親王醫院不公平，將資源向港大及瑪麗醫院嚴重傾斜。佢形容當時李國章好似「狗咬骨頭不放」，追住佢唔放，當然佢亦好幫手，替李約見相關官員。
狠批有黨派想搞亂港大
卿姐問李國章，會否因為上述事件而對港大懷恨在心？李國章當然否認啦，自稱做教統局局長時都無偏心中大，仲批准港大成立明德學院同港大同學會小學和書院添！既然佢處事公平，為何眾人又咬住佢唔放呢？李國章喺節目中提到，港大並非存在管治問題，而係政治問題，批評有黨派搞亂港大，又形容有人「想放陳文敏入嚟做副校長」。
對於校委會鮮有否決遴選委員會嘅任命，李國章指校委會並非橡皮圖章，又指若容許無博士學位嘅陳文敏任副校長，就好似一個中學生考唔入大學，但竟然有資格決定邊個可以入大學，自然會令有博士學位嘅教職員唔順氣。
斥會議錄音「漏啲唔漏啲」
講到有部分校委會錄音流出，李國章好激動話，「漏啲唔漏啲」係歪曲事實，但因為尊重陳文敏私隱，佢唔會公開全部對話。佢又話，有人已經就校委會否決陳文敏任命提出司法覆核，他深信陳文敏被否決係因為學術能力唔達標，又指如果喺法庭上公開校委會對話，可以還佢一個清白。
李國章又透露，基於保安考慮，下周二舉行嘅校委會會議將重返港大鈕魯詩樓舉行，強調校委會有老人、有女人，之前轉地方開會係基於安全考慮，而今次決定係同校方討論後嘅結果，他會以平常心看待。