中環出更：「防狐」有法 女議員晒幸福
由「爆粗大狀」馬恩國出任團長嘅訪京團爆出攬女醜聞，成為政壇熱話。其實政壇人物少不免都要出外應酬，尤其係立法會議員，要花更多時間開會，同家人可以話係聚少離多，唔知女議員會唔會擔心過老公出外逢場作戲，甚至有外遇？卓妮問過四位女議員，佢哋不約而同話未驚過。唔知佢哋有咩獨門「防狐招數」嘅呢？
一向同老公梁海明人前人後晒恩愛嘅立法會議員蔣麗芸（阿Ann）話，完全信任老公，唔會諗外遇問題。阿Ann實行「放任大法」，畀足梁海明自由，咁做反而收服咗老公。阿Ann話，老公出外公幹時，上機前後都會打電話報平安，有時夜晚仲會打嚟講晚安，真係冧晒。
同樣對老公一萬個放心嘅梁美芬就話，夫妻之間係建基於信任，如果成日胡思亂想，關係會變得無意思，相信佢丈夫、城大法律學院前院長王貴國實覺得好啱聽喇！身兼理工大學講師嘅黃碧雲亦對丈夫好放心，因為兩人係同事，所以同事仲會同佢講老公嘅事，咁咪等於布滿線眼？
結婚16載 EQ仲有心跳感覺
尋日適逢結婚十六周年嘅葛珮帆（EQ）就話，依家見到老公都仲會有心跳嘅感覺喎！EQ仲自爆，以前拍拖時，佢出外公幹都會寄信畀老公，依家都仲留住成箱信。有次兩人去南極玩，EQ老公雖然會暈船浪，但都陪佢坐探險船，結果嘔咗五日兼瘦咗廿磅。卓妮聽四位女議員一輪嘴晒幸福，覺得太陽好似一直都冇落過山，一路都咁曬囉！
卓妮