古人話，大學之道，在明明德，在親民，在止於至善。不過今時今日睇怕都要改寫咯，堂堂大學涉嫌搞僭建，明德就冇，失德就有；親民就冇，傷民就有；邊係止於至善吖，亂七八糟就差唔多！
冇錯，講緊嘅咪係城市大學冧屋頂事故囉。該校運動中心綠化屋頂日前突然倒塌，三人受傷，震驚全港，事件唔止動搖市民對樓宇安全監管嘅信心，仲塌出一個大學行政管理嘅黑洞，令人對大學管理質素「刮目相看」。講真，涉事屋頂成三個籃球場咁大，綠化工程又涉及植被及排水系統等大型工序，校方居然膽粗粗無向屋宇署入則申請，細路仔都知有唔妥喇。
嗱，建築測量界人士係咁講嘅，根據《建築物條例》，業主喺進行建築工程前，應先聘請認可人士作評估，再聘用承建商動工，家陣城大本末倒置，未入則就搞天台綠化工程，自把自為，同僭建冇乜分別嘅咋。話時話，肇事運動中心原擬第二日舉行慶典，三百人出席，如果遲一日倒塌，分分鐘死得人多。僭建害人害物，珍珠都冇咁真o架。
真係諗極都唔明，堂堂大學，居然都搞僭建，仲有冇離譜啲吖。一般小業主就話對建築法例唔熟悉，又或者貪心，容易誤墮法網啫，大學裏面有專家，有學者，有專業人士，冇理由唔知僭建違法o架。喺香港，掛個廣告牌都要入則申請喇。多年前終審法院有一宗案例，裁定室內工程又未涉及結構改變，先至可以豁免入則，而城大運動中心成個天台進行綠化工程，兩樣條件都唔符合，居然側側膊搵個承建商自己搞掂，冇人睇得出有問題，或者有人睇出問題卻闊佬懶理，簡直匪夷所思。
係人都知，天台綠化工程雖然可以美化環境，但亦會帶來好多問題，例如增加重量，孳生蚊蟲，而泥土阻塞水管亦會造成滲漏問題，日積月累就埋下禍根。香港自詡法治之區，點可以無規無矩想點就點o架，一旦出事咪咎由自取囉。
講起都幾唏噓，本港大學近年是非多多，辦學一味向錢看，課程濫竽充數，師資每況愈下，國際排名跌跌不休，早已備受詬病，家陣仲爆出豆腐渣工程，簡直醜上加醜。爆出冧屋頂事故後，城大校方急急成立小組調查，話會還社會一個交代喎，大家聽住先喇，近年公營機構醜聞不絕，有邊次唔係話調查檢討，但又有邊次真係會吸取教訓吖？
一句講晒，學校進行綠化工程唔係話唔得，但必須跟足法例行事。人命關天，大學跌爛招牌事小，搞出人命事大吖！