政情：周浩鼎衝紅燈趕去茶敍
本身係律師嘅離島區議員周浩鼎（Holden），自從喺今年二月嘅立法會新界東補選落敗後已好少露面，直至尋日先聯同數名黨友喺中環搞茶敍。不過，唔知Holden係咪預時間預得太緊，我哋喺茶敍前見到佢喺街上急急腳咁行，明知轉緊紅燈都照衝。其實佢過到一半嘅時候，見到無車先繼續過埋另一半馬路，但咁樣亂過馬路，唔通佢真係覺得無人認得自己？周浩鼎對事件致歉，強調唔會再犯。
講番個傳媒茶敍，除咗Holden，仲有荃灣區議員林琳、屯門區議員巫成鋒及沙田區議員李世榮。佢哋合組成為「周浩鼎辦公室」成員，又玩食字將四人嘅名字合組為「琳鋒鼎李」，話希望集合多啲年輕人，帶嚟更多新氣象同諗法喎。雖然各人都講到大家之間有啲淵源，但就硬係講唔出組合成立嘅真正目的，只係東拉西扯咁講咗啲社會議題，實在唔知搞乜，睇怕未集合到年輕人前，已經「鼎李」聲四起。
