政情：塌頂冇得「舒服」放假 吳得掂捱轟
城市大學日前發生塌綠化屋頂事件，全港都關注綠化屋頂嘅潛在危險，教育局局長吳克儉（吳得掂）尋日出席香港副校長會一個有關學校領導角色嘅研討會，致詞時亦有主動提及事件，點知講多錯多。吳得掂話，本來諗住上星期放假好舒服，點知突然出現綠化天台倒塌事件。就因為佢講咗句「舒服」，網民狂插話請個局長係為咗放假舒服嘅咩？而佢話無諗過城大倒塌頂事件會涉及其他學校，更加反映佢幾無知。
吳得掂唔止講錯嘢，跟住仲搞爛gag，話副校長會喺一二年九月成立，當時為咗同多啲校長接觸就出席活動兼拍照，依家創會場刊嘅照片都有佢喺度，又話同副校長會接觸仲有好多好處，因為當年十三位幹事大部分已升呢成為校長，而當年該會用以舉辦創會研討會嘅香港教育學院，亦都獲立法會通過正名為香港教育大學。咁講，唔通佢再次出席副校長會活動，係想有機會再上位？老實講，佢上任以來事事搞到一鑊泡，民望屢創新低，如果仲以為可以上位，真係妙想天開。