政情：六四聯校晚會分裂 港大嫌貴退出
本身係支聯會創會成員嘅香港專上學生聯會（學聯）歷史性退出支聯會後，十一間大專院校聲稱會另起爐灶舉行聯校六四晚會，可惜舊年「退聯潮」之後，學界大分裂已成定局。港大學生會會長孫曉嵐尋日宣布因為財務問題，決定退出聯校六四晚會，自行在校內舉辦六四晚會及學術論壇。雖然孫曉嵐否認多於一個晚會會影響院校團結，但一個聯校晚會都未能成功協調，好難令人相信學界唔係分裂囉！
聲稱違反財政預算
孫曉嵐話，聯校六四晚會計劃喺中大百萬大道舉行，由於所需費用昂貴，而且各大院校做唔到平均攤分，違反港大學生會原定嘅財政預算，所以港大較早前決定退出。而港大學生會喺校方協助之下，會花費一萬六千元喺港大中山廣場舉行六四晚會同論壇，預計會有一千人參與。
她又話，曾經建議其他院校喺港大舉行六四晚會，以減低開支，但當時其他院校學生會認為中山廣場場地太細而拒絕。她認為，並非一定要一齊籌辦六四晚會先顯示出學界大團結，只要學界喺晚會嘅理念方向一致，已經足夠，又指多幾個晚會可以給予同學唔同面向嘅討論。
至於晚會形式，港大評議會時委會署理主席黎的琛就話，晚會唔會點蠟燭，亦不會唱歌，覺得無必要，又形容點蠟燭只係習慣。晚會之後會有一個半小時嘅論壇，由五代香港人討論香港前途問題。被問到香港前途問題同六四事件有何關係時，他指六四係好多港人嘅政治啟蒙，所以要利用呢個重要契機，就香港重要嘅前途問題展開討論。
有儲備 解釋不成理
雖然孫曉嵐指唔參與聯校六四晚會唔會影響院校團結，但以財務問題去解釋不合作原因，實在有啲說不過去。一來港大學生會本身有儲備，二來該會早前曾因為斥資十五萬元搞手機應用程式（App）引起爭議，雖然個App最後胎死腹中，但都反映十零廿萬元對該會嚟講絕對不成問題，所以財務問題會唔會係該會嘅一個藉口呢？