由「粗口大狀」馬恩國任主席嘅中澳法學交流基金會（基金會），上周舉辦「一帶一路」訪京團，繼引述基本法委員會副主任張榮順，指中央處理港獨「要槍有槍，要炮有炮」言論被轟「亂講嘢」惹嚟爭議，最新爆出兩名男團員夜蒲攬女事件。據報身兼廣東省潮安縣政協嘅律師佘英輝及交通安全隊高級助理總監翁繼文，一連三晚在訪京團行程後光顧北京KTV，並同性感女子「頭貼頭」合照。
佘英輝回應傳媒查詢時稱：「我哋做律師，應酬吓吖嘛呢啲。我自己啲朋友嚟嘅，同訪京團無任何關係。」翁繼文就話有關活動係私人生活，純粹應酬，與訪京無關，佢仲話，「攬住跳舞，好多人都會喇，我覺得冇乜特別」，又指可能飲咗酒先會較貼近合照，「男女都係面貼面」，強調照片全部「見得光」。
翁繼文更指參加訪京團只是「畀面派對」，自己只是去「聽吓嘢」，無乜出席活動，又強調去卡拉ＯＫ好正常，因為他只是去「法律會」，唔係同國家任何人開會。
對於有團員夜蒲攬女事件，隨團嘅立法會議員梁美芬對事件表示強烈不滿，相信事件絕對係個別團員嘅個別行為，但喺出團期間發生呢啲事，佢話好唔高興同唔可以接受。
自從馬恩國「亂講嘢」惹爭議，基本法委員會委員譚惠珠前晚已辭去基金會榮譽顧問一職，而佘英輝及翁繼文相差兩小時後，亦分別辭去基金會顧問和附屬會員。
此外，翁、佘二人分別擔任交通安全隊推廣及宣傳署長及副署長，香港交通安全隊發言人指兩人已經即時停職，管理層會就事件展開調查。
卓妮