中環出更：名人執拾有方 唔怕外傭荒
印尼同菲律賓近年逐步減少輸出外傭，有市民擔心到時可能會出現外傭荒，一傭難求，唔知啲名人又有咩對策呢？卓妮日前喺沙田馬場見到香港善德基金會創會主席董吳玲玲及兒子董必政，雖然佢哋家中都有請外傭幫手，但原來董太一向都有訓練兩個兒子自細要自己執房，保持乾淨整齊，唔使吓吓靠外傭。
董吳玲玲話，兩個仔由小學開始，已經每逢周末檢查佢哋房間整潔程度，養成佢哋有手尾嘅好習慣，仲記得以前阿仔一聽到要檢查，就會要求十分鐘時間預備，而佢就會酌情畀足半個鐘。雖然佢知道阿仔只係將啲嘢「嗱嗱聲」收晒入櫃，但佢見啲嘢都捲得好哋哋，勉強收貨喇！董必政依家搬咗出去住就明白當年培養呢個習慣幾咁有用喇。
天才書房亂 吳傑莊笑言唔夠叻
博愛醫院永遠顧問藍國慶亦好愛整潔，平日用完啲嘢一定會放回原位，啲衫仲會放入盒先再放入櫃，根本都唔使人幫手執咁滯。佢太太藍王雲仙就試過喺房唔見咗一頂好鍾意嘅帽，傷心到喊出嚟，好彩只係媽媽幫佢放咗入書房，並無唔見，所以話好多嘢其實自己執番最方便。
不過，睡房始終係好私人嘅地方，有啲人就算有外傭都未必鍾意他人整理，早前網上仲流傳好多天才或科學家嘅書房都係特別凌亂，香港青聯常務副主席吳傑莊就笑言自己未有咁叻，所以間房未算好亂，但由於工作繁忙，電腦旁總係無可避免有一堆文件，但佢隨時都講得出自己啲嘢放咗喺邊個位喎。
卓妮