有人話，港府處理假難民問題後知後覺，踢一踢至郁一郁，似足一塊四方木，不過功夫茶就覺得似碌廢柴多啲囉。老實講，當局無能成咁，呢場老鼠戲病貓嘅遊戲肯定沒完沒了吖。
唔係亂噏o架，打擊人蛇嘅修例姍姍來遲就係典型例子喇。港府今日將會刊憲修訂入境條例，將「未獲授權進境者」嘅定義擴至巴基斯坦、印度、阿富汗及孟加拉等另外八個非華裔偷渡客主要來源國，同時大幅提高呢八個國家蛇頭嘅刑罰，最高可判監禁十四年及罰款五百萬港元，即日生效。咪以為當局主動出擊吖，其實係被動補鑊咋，如果唔係問題不斷惡化，傳媒不斷呼籲，民怨不斷擴大，佢哋都唔會做嘢吖。
話時話，港府早就應該補鑊喇。本港現時積壓一萬一千多宗免遣返聲請個案，超過半數係由非華裔非法入境者提出，反映南亞裔及非洲裔人蛇問題嚴重，但係入境條例中偷渡客嘅定義居然只針對內地同胞同越南籍人士，何止係落後形勢，簡直係嚴重失職。開講有話，刑罰過輕等於鼓勵，入境條例漏洞百出，蛇頭就算落網亦只會被控協助或教唆他人非法入境等較輕罪行，點會有阻嚇力吖。所以話，偷渡潮愈演愈烈，香港被假難民搞到烏煙瘴氣，港府絕對應記首功吖。
最離譜嘅係，當局補鑊都補到唔湯唔水。係人都知，難民潮席捲全球，假難民更加無種族之分，既然當局修補漏洞，點解唔做得徹底啲，將新例涵蓋地球村嘅人蛇同蛇頭？家陣法律面前，唔係蛇頭平等，除咗呢十個地區加大阻嚇力，其他地區繼續從輕發落，咪即係等於鼓勵偷渡？咪即係等於開門揖盜？當局修例做啲唔做啲，留低咁大個漏洞，唔通想靠害？咪話唔提醒，如果連伊拉克、敍利亞人蛇都嚟埋，香港變聯合國難民營事小，引入恐怖分子至大鑊吖！
正所謂，蒼蠅不叮無縫嘅蛋，港產官僚一係唔做嘢，一係做到甩甩漏漏，香港想唔變成難民天堂都幾難。仲有吖，本港黑社會與人蛇集團勾勾搭搭，狼狽為奸，和勝和前坐館、綽號「上海仔」嘅郭永鴻被指係「假難民之父」，家陣罪魁禍首繼續逍遙法外，所謂打擊人蛇、修訂條例，根本係治標不治本嘅咋。呢，南亞兵團犯案無日無之，尋日十幾名尼泊爾漢趁一名印度少年喺後巷小解時施襲，搶走手提電話，連自己友都唔放過，仲有乜嘢傷天害理嘅事做唔出吖。
冇符喇，港府無心無肺，唔踢唔郁，各位市民如果唔想繼續畀假難民問題困擾，不如一齊大大力踢醒班官僚喇。