政情：公民講場：外力干預校政 張仁良扮聾

立法會尋日通過將香港教育學院升格為大學嘅條例草案，政府在下周五刊憲後，教院會正式改名為香港教育大學。現時教院由特首委任的校董比例很高，而特首亦擔任必然校監，之前就有學者建議立法會趁審議有關條例草案之時，一併修改教院校董會架構，以便其他大學有先例可循。不過教育學院校長張仁良就話，喺過去三年校長任期內，睇唔到有任何外來勢力想干預學校自主喎！咁就奇喇，莫非之前提出修改教院校董會架構嗰位學者被當透明？抑或張仁良埋首處理升格事宜，被外來勢力入侵都聽唔到、睇唔見呢？