政情：囡囡拍拖 梁志祥「放任政策」
生女比生仔更令人緊張同擔心，好似立法會議員梁志祥嘅細女已經十六歲，佢笑指女兒有一百六十八厘米高，係一個肥妹仔，仲話太太原本諗住要嚴密監控，唔准女兒拍拖，但佢就叫停太太唔好咁做，又估唔到佢原來咁開通喎，睇嚟佢都幾錫個女。
怕管得嚴失互信
梁志祥話，佢同太太都有問女兒有冇拍拖，雖然個女話冇，但佢哋相信係有嘅，但個女都咁大個，如果呢樣又叫佢唔好做、嗰樣又叫佢唔好做，怕女兒會唔鍾意，亦唔信父母，所以佢連門禁時間都唔敢限定，只係敢兜個圈同個女講「如果你夜返呢，我哋要等你門先瞓」。
梁志祥覺得，女兒同朋友出街都幾好，好過留喺屋企做宅女，但凡事都有得有失，如果放假想同個女飲茶，就要預早約定喇！