中環出更：象哥投錯票 符碌定甩轆？
進出口界立法會議員黃定光（象哥）前日嫁女，唔知係咪因為屋企辦喜事太忙，搞到攰得滯唔夠精神，尋日竟然喺立法會投錯票。話說尋日朝早立法會就《二○一六年香港教育學院（修訂）條例草案》三讀投票時，喺二讀投票支持條例草案嘅象哥竟然投咗反對票，成為唯一一位投票反對香港教育學院正名大學嘅議員。象哥反對，搞到大家都不明所以，甚至懷疑象哥又因為閉目養神，忽然扎醒按錯掣添。
教院正名未獲全票通過
象哥事後就解釋，三讀投票時佢正忙於處理邊境購物城工程事宜，忙起上嚟又加上喉嚨唔舒服，搞到「符碌咗」，分神按錯掣，強調自己係支持條例草案，二讀都有投票支持，大家都清楚佢嘅態度同立場。被問到唔能夠令教院正名獲全票通過會唔會好遺憾，象哥就話，要遺憾都係對自己按錯掣感到遺憾。好彩條例草案大比數通過，如果因為佢一票而被否決，呢個遺憾就大喇！
講開又講，其實象哥話自己「符碌咗」唔多正確，因為「符碌」來自英文「Fluke」，解作僥倖、靠運氣取得成功或勝利，所以象哥今次係「甩轆」至真。
卓妮