中環出更：江蘇鄉親 新會所品佳餚
本港好多同鄉組織都開設自家會所聯誼，例如浙江軒、寧波同鄉會、上海總會等，尋日又多個會所正式開幕，就係由香港江蘇社團總會、香港南京總會及多個江蘇同鄉組織創立嘅「江蘇薈」，多位政商界名人都有到賀。其中喺江蘇省南京市長大嘅香港南京總會創會會長張心瑜話，現時喺香港不時都會緬懷家鄉菜，所以請咗個大廚，得閒煮番幾味江蘇家鄉菜宴請親朋好友。
生於南京嘅張心瑜對於江蘇美食如數家珍，但江蘇菜種類繁多又各有風味，佢最鍾意莫過於小籠包及糖醋排骨。尋日開幕禮上都有唔少精緻江蘇佳餚，包括冷盤、粉皮魚圓湯、蘆葦心籽蝦及清蒸長江鰣魚等，主打清淡及鹹甜適中嘅菜式。佢仲話，南京有好多風景都好靚，好似著名嘅梅花山，每年四至五月期間均會開滿一山梅花，即係依家呢個時候去就有花睇喇，氣氛非常浪漫。
「樓神」獨愛太湖白魚
張心瑜仲話，南京嘅梧桐樹亦因宋美齡而聞名，事關宋美齡鍾愛梧桐樹，而網上亦曾流傳多張俗稱「美齡宮」的南京國民政府主席官邸舊址嘅高空航拍照，發現圍繞四周嘅梧桐樹於高空觀看時形狀好似一條頸鏈，成為佳話。
同場仲有同為江蘇人嘅長實地產執行董事「樓神」趙國雄，講到江蘇最出名嘅食品，佢就話梗係大閘蟹啦！因為有太湖及陽澄湖兩個盛產大閘蟹嘅地方，但佢就麻麻哋鍾意食蟹，反而鍾意食魚多啲，被稱為「太湖三白」中肉質鮮嫩嘅白魚及白蝦就係佢至愛喇。
中華總商會副會長李德麟亦有現身，佢話自己係浙江人，浙江毗鄰江蘇，大家都係同一條江（長江）嘅鄰居，所以飲食習慣相近，愛食江鮮。
卓妮