香港成日被人話係文化沙漠，其實係一種誤解，淨係睇每次有國際珍貴藝術品來港展出都人山人海就知喇，展館仲墟冚過麻雀館，證明香港人同樣熱愛文化，重視心靈嘅滿足同享受。但可惜吖，港產官僚得過且過，展覽館問題多多，唔係地點零散內容乏味，就係設備仲老爺過啲古董藝術品，市民享受變難受，簡直大殺風景。
係咁嘅，香港文化博物館近日舉辦印象派著名畫家莫奈作品展，吸引大批市民慕名而來，當中唔少人租用館方提供嘅錄音導賞設備，諗住加深對畫作嘅認識，提高品味，點知由於人數太多及場地限制，根本無辦法睇清楚畫作號碼嚟收聽錄音，就算租到導賞機都得物無所用。你知喇，唔係人人都係藝術家，唔少市民連印象派係乜東東都冇乜印象，導賞機發揮唔到導賞功能，興致大打折扣，莫奈就冇嘞，無奈就大把。
本報去其他康文署轄下嘅博物館睇過，發現導賞設備同樣天殘地缺，揭出至少四宗罪，包括聲量被多媒體展品嘅聲量蓋過、電池消耗太快、耳機設計難以佩戴、耳機未有附上消毒綿套等。藝術評論人批評導賞設備老爺化，至少比外國落後咗十年，除咗會削弱遊人參觀意欲，仲會令香港淪為國際笑話。
有人話，從博物館可以睇到人類嘅文明，計功夫茶話齋，從博物館更加可以睇到港府嘅無能。其實，現今網絡科技日新月異，導賞設備早就改頭換貌喇，好似外國博物館咁，好多年前已經開發手機應用程式，只要遊人喺館內打開有關APPS，(手禁)幾個掣就可以收聽導賞錄音，連藝術品及藝術家嘅相關資訊都有埋添，既方便又輕鬆，幾正吖，香港居然仲用緊老爺機，放入博物館當古董展覽就差唔多。
再講吖，導賞設備落後，問題唔止影響參觀意欲咁簡單(口架)。導賞機由遊人共用，始終存在不衞生甚至傳染病菌嘅風險，隨時唔係聽出耳油，而係聽出耳疾都似。以前科技未夠發達，條件有限，就話無辦法啫，家陣時代進步，好多以前嘅麻煩事家陣可以輕鬆搞掂，官僚居然墨守成規，連行多一步都唔肯，你話佢哋有冇做好自己份工吖。
見微知著，連導賞設備咁小嘅事情都做唔好，港府仲話要將西九文化區打造成媲美西班牙畢爾包、法國龐比度嘅世界級文化中心喎，冇鏡都唔該搵盆水照下自己喇。事實證明，香港嘅文化藝術產業之所以一直搞唔起，主要原因唔係文化沙漠，而係官僚嘅腦袋塞滿沙同草咋！