政情：大仔畢業 施榮懷安樂晒
香港中華廠商聯合會前會長施榮懷（Irons）早幾日同太太遠赴美國，出席大仔施湧樂嘅畢業禮，仲喺社交網站上載一家人嘅開心合照。Irons話，今次赴美心情同八年前送湧樂去讀中學時嘅心情唔同，事關當年大仔十四歲，送去美國讀中學時仍感覺大仔係細路，好擔心佢唔知慣唔慣，難免依依不捨，但依家唔經唔覺已經廿二歲，喺波士頓大學生物醫學工程系畢業。
雖然Irons一直畀大仔好大自由度，但好驚喜成績又唔錯，嚟緊仲會留多一年讀埋碩士，同留喺當地工作幾年，事關生物醫學工程喺香港發展空間比較小。不過，佢話讀邊科又唔一定要做番嗰行嘅，唔通暗示想大仔遲啲返香港幫手打理家族生意？佢就話會睇番大仔嘅意向，但湧樂就講笑話要做健身教練。
Irons又話，見湧樂同細仔仲樂都高過自己，覺得好安慰又好有安全感，而佢同太太過美國點租車同去邊度玩都係由兩個仔安排好晒，所以將來要靠仔養喎！