不滿無了期開「阿公數」
事隔半年，鄉議局執委會討論向研究中心撥款一百萬元，作為本年度第一期恒常經費，再度令研究中心捱批。
有鄉紳喺會上直言，見到研究中心每個月用廿幾萬元「肉都赤」，唔可能無了期咁開「阿公數」，如果將來改以夾錢或籌款形式佢就無意見。至於上次大動肝火嘅張學明，今次只係話研究中心嘅效益可以做得更好，而且唔需要每個報告都由中心職員撰寫，可考慮外判。雖然呢個項目引起大家熱烈討論，但最後都喺有驚無險下通過。
另外，本身係鄉議局增選議員嘅香港會計師公會前會長趙麗娟，上月底去信鄉議局，指因需要處理私人事務而辭去增選議員一職。鄉議局正處於多事之秋，趙喺呢個時候辭職難免會惹嚟猜測。