政情：創科局唔創新 業界柴台
創新及科技局（創科局）成立咗一段時間，政策多多，其中創新及科技基金之下將推出「科技券先導計劃」（科技券），預計下半年推出。據了解，當局其中一個方向打算限定提供服務嘅公司，必須係科學園及數碼港之下嘅公司，而且要買斷產品版權，但創科界就大叫唔妥當，批評當局仍沿用舊方式推行計劃，未能迎合創科界嘅需要，莫非創科局局長楊偉雄仲停留喺七七年Steve Jobs向佢推銷產品嘅年代？
指定幫襯科學園數碼港公司
耗費五億元嘅科技券，將會以配對模式，為每間合資格中小企提供最多二十萬元資助，為期三年。智慧城市聯盟召集人楊全盛話，科學園及數碼港嘅公司，都係一啲初創企業，根本好少提供常用商業方案，擔心中小企好難買到合心水嘅產品。佢指唔少其他本地公司更加貼近市場，提供產品給中小企會更合適，即使當局擔心有人濫用制度呃錢，但其實可以為科技券設立一個類似採購名單制度，畀業界申請加入，以便進行監察。
永久買斷版權做法貴夾死板
據了解，楊全盛早前曾聯同廿多名創科界人士，同創新科技署署長蔡淑嫻商討科技券計劃，業界喺會上批評，科技券初步打算要求企業購買軟件要永久買斷版權，但呢個諗法係受政府傳統採購制度影響，制度規定各部門必須永久買斷版權，但依家大部分商業版軟件都採取類似租用模式，呢種模式有多種好處，包括方便用家能夠使用最新軟件，價錢亦平好多，相反如果要永久買斷版權，科技公司就要特別製作另一個版本，價錢相對貴好多。
另外，業界喺會面中又提到，政府應該帶頭優先採購本地科技，即使受世界貿易組織所限，但按規定，約一百六十萬元以下採購係可以豁免嘅，呢個做法可讓本地公司有本錢爭取更大嘅外國訂單。話時話，創科局算係新成立，但創新科技署就無理由唔知業界需要，到底真係唔認識業界實際運作吖？抑或是「大腦」好耐未用過，搞到轉數慢呢？