中環出更：葉劉突申報擁海外公司
巴拿馬文件風波揭露全球政商界名人離岸公司資料，本港唔少政商界名人亦都被捲入其中。行政會議成員兼立法會議員葉劉淑儀（葉劉）近日突然更新行會同立法會嘅個人利益申報資料，列明自己持有一間名為Bonticello Holdings Limited海外註冊公司，莫非葉劉怕火燒連環船，所以預早撲熄火頭？
葉劉上月廿二日分別向行會同立法會更新個人利益登記資料，列明自己持有上述海外公司百分之百嘅股份，而呢間公司喺港島中西區持有一個住宅物業，以及喺新界西持有一個工商物業。而喺行會嘅資料，更分別列明港島中西區物業係用作出租，而荃灣區嘅工商物業就係自用嘅。
巴拿馬文件風波後補飛
其實葉劉早於○二年出任保安局局長及○八年任議員時嘅個人利益登記都有申報上述公司，但喺今屆立法會就只報咗有關物業由海外公司持有。葉劉解釋，因為最近嘅巴拿馬文件風波，令佢重新審視自己嘅申報，先發覺漏咗申報公司名，覺得應該要連公司名都申報埋。佢又話，應該係當年咁啱換秘書，可能查閱文件時無咁詳細，所以先漏咗公司名。
卓妮