綠色先鋒：復耕護螢
誠徵「復育有心人」！香港光污染愈趨嚴重，威脅部分對光敏感的動物生態，螢火蟲是其中一種。香港有三十多種螢火蟲，但不少人從未親眼見過，去年有環保團體把荒田復耕，最近尋找有心人作螢火蟲科學調查，觀察及記錄螢火蟲的數目及生存環境，為螢火蟲打造與人類共存的空間。
「希望可收集螢火蟲數據成功，講畀大眾知道螢火蟲構造出嚟嘅食物鏈係點樣，之後就會做魚類、鳥類，為生態做多啲嘢。」從事前線動物保育十多年的「馬屎老師」，○七年曾開設生態農莊，一○年起推動螢火蟲復育，去年起加入清潭地產復耕，繼續推動農地生態，今年推出「清潭螢火蟲復育×公民科學」計劃，與十五位復育有心人尋找螢火蟲。
清潭地產位於清潭水塘下，原是一片荒田，但生態資源豐富，馬屎老師與同伴花了兩個月復耕，藉着開墾耕地致清水流動，現時已有五種螢火蟲品種聚居，包括邊褐端黑螢、黃緣雌光螢、熠螢、雷氏螢及寬緣窗螢，「學員學嘅唔單止係睇螢火蟲，更加要學埋掘土、剪草，打造一個啱螢火蟲居住嘅空間。」
為螢火蟲打造安樂窩
「做到幾多得幾多，其實復耕唔難，只係有冇人願意去做。」馬屎老師指，在復耕菜田時花盡心思，「之前農田被棄耕，所以冇晒啲水坑，我哋復耕嗰時喺田中間掘啲好深嘅水坑，雷氏螢幼蟲就可以住喺入面。」
「十五個人分成三隊，每個星期計算螢火蟲嘅位置都互換，提高數據可靠性。」馬屎老師坦言，一人力量有限，難以收集螢火蟲數據，而過往宣揚螢火蟲意識的大多靠展覽及傳媒報道，希望藉此計劃集合眾人之力，透過科學數據證實多樣的農地生態，能協助有機耕種發展，為螢火蟲打造安樂窩，「今次雖然得十五位有心人，但當佢哋有興趣就會返嚟繼續研究，亦會向外宣揚有關意識，漸漸就會愈來愈多人了解。」
圖：朱偉坤
文：周詠欣