香港成日畀人話冇景點，其實呢啲只係假象，好似「馬路噴泉」咁吖，直頭可以列入「世界第八大奇迹」。唔係講笑㗎，港產「馬路噴泉」遍地開花，今日喺港島，聽日可以喺九龍或新界，分分鐘帶畀旅客無限驚喜，世界奇迹實至名歸！
冇錯喇，功夫茶講緊嘅咪係失驚無神爆到七彩嘅地下水管囉。尋日下晝之嘛，觀塘協和街一條直徑四百毫米嘅地下鹹水管突然爆裂，一條巨大嘅黃泥水柱激射而出，場面極為壯觀；同場仲加映「馬路吞巴士」表演，由於爆水管導致路陷，一架雙層巴士後輪卡喺五米乘五米大窿內，動彈不得，進退失據，好彩冇人受傷咋。
喺荷里活災難片裏面，經常有外星人侵襲大都市嘅橋段，搞到七國咁亂，哀鴻遍野，其實唔使入戲院，爆水管下嘅香港，一樣可以經歷咁驚心動魄嘅一幕。講真，今次只係交通癱瘓、商戶做唔到生意，算小兒科咯，幾年前跑馬地黃泥涌道爆水管，成個港島五十萬人斷水超過十小時，被迫輪水應急，連醫院都不能幸免，搞到怨聲載道，冇搞出人命已經還得神落。
唔講唔知，原來本港平均每年發生二、三百宗爆水管事故，當中大部分涉及水管老化。好似今次出事嘅水管咁吖，使用超過二十年，而附近一段水管今年初至啱啱爆完，水務署官僚咁都查唔出有問題，簡直豈有此理！話時話，水務署十幾年前已經話要更換及修護全港水管，點知一味歎慢板，到依家都未搞掂。本港水管滲漏率高達一成六，反觀東京、首爾以及悉尼等大城市，比率只係由百分之二至八不等，你話係咪羞家吖。
講開水管老化，舊年湖北武漢掘出一段有一百零六年歷史嘅水管，雖然歷史悠久，但竟然一次都未爆過。所以話啫，舊水管保養得宜仲可以繼續使用，廢官僚敷衍塞責，得過且過咯喎，咁就醫番都嘥藥費喇！
冇錯喇，開講有話水為財，水務署浪費食水等於倒錢落鹹水海。水務署開支由二十年前嘅四十五億元大幅飆升至舊年嘅八十多億元，幾乎翻咗一番咁滯。最諷刺嘅係，東江水年年加價，其中唔少就係因為滲漏或爆水管而白白浪費，呢啲唔係敗家又係咩呀。至於食水含鉛，搞到全港人心惶惶，水務署官僚更加吟詩都吟唔甩。
講到呢度，大家應該知點解得港府成日畀人鬧「無知無覺無神經」喇。公帑呢度浪費，嗰度揮霍，官老爺眉頭都唔皺一下，叫佢哋保障長者退休生活就牙痛咁聲，推三阻四。計功夫茶話齋，港產官僚尸位素餐竟然享受世界一流薪酬，先至係世界最大奇迹吖！