尋日長洲舉行一年一度太平清醮盛事，重頭戲飄色巡遊唔少角色都係諷刺時弊，令人會心一笑。計功夫茶話齋，如果主辦單位今年請教育局局長吳克儉客串扮番自己，仲要係由頭濕到落腳嘅落湯雞造型，就更加應景嘞。教育局日前害到唔少學生紅雨警報返學濕身，等佢嘗吓箇中滋味吖嘛！
講起就火都嚟埋，當日全港多區滂沱大雨，天文台喺早上七時三十五分發出首個紅雨警報，教育局居然喺十分鐘後至宣布學校停課，令學生同家長無所適從，唔少人更加因為唔知停課安排而出門上學，搞到裙拉褲濕，狼狽不堪，你話當局係咪靠害吖。天災可怕，人禍更可怕，教育官僚唔係愛護學生，而係玩殘學生，唔使問，梗係淪為眾矢之的，全城鬧爆喇。
嗱，可能被鬧醒啩，作為教育局最高負責人嘅吳克儉終於現身受靶，話局方已與天文台取得共識，會喺一個月內推出優化措施，同步發出暴雨警告信號及宣布停課安排，而局方亦會加強與學校溝通，喺暴雨停課期間有特別應變措施，包括保持校舍開放，以及安排教職員照顧學生咁話。
早就應該咁做喇。正如功夫茶日前指出，既然法例規定當天文台喺早上六時至八時發出黑色或紅色暴雨信號，全港上午及全日制學校均需停課，當局根本一早就應該採取同步宣布嘅做法，確保學生同家長可以第一時間掌握訊息，減少誤會同產生混亂嘅機會。教育官僚唔踢唔識郁，下下要人提至識做嘢，仲有乜嘢存在價值吖？
講真，紅雨警報同停課安排應該同步宣布，呢個係基本常識，港產官僚居然家陣至如夢初醒，呢個政府究竟有幾廢，可想而知。天氣同市民生活息息相關，打風落雨係常見現象，當局連咁簡單嘅事情都處理唔好，其他突發或者重大問題就更加唔使旨意可以處理好喇。所以話，教育局屢吃敗仗，國民教育胎死腹中，TSA被迫讓步，唔係冇原因（口架），而幼稚園濫收報名費問題長期零監管，就更加符合教育官僚嘅苟且作風喇。
講起都幾無奈，港產官僚薪高糧準，點知佢哋冇做好自己份工，胡混度日不特止，仲添煩添亂。難為港府高層仲死撐，講乜嘢「以天氣論天氣，科學決策」嘅廢話，簡直唔知個醜字點寫。政府無能，好彩香港有第四權監察政府咋，如果唔係，「吳得掂」局長可能仲忙住緬懷日本賞櫻，邊會認衰自我糾正吖。
所以話啫，紅雨停課機制雖然優化咗，但如果官僚嘅腦筋繼續僵化，隨時繼續撞板嘅咋！