下屆特首之戰，已令人聞到多少火藥味。高官之中，鬍鬚曾頻頻同CY唱反調；最明顯嘅莫過於喺政策上，好似早前樓市減辣，鬍鬚曾呢頭話會考慮，CY嗰頭話冇可能；對香港足球嘅取態更是路人皆見，鬍鬚曾直情係日頭曬山芋——乾乾脆脆的在其網誌撐港隊，使人感到CY的閃爍，果然充滿語言偽術！呢，最近佢又藉支持十八場職業拳賽不敗嘅「神奇小子」曹星如，話體育其實係一門大生意，盲嘅都睇得出寸CY曾經講過「體育對經濟冇貢獻」，做頂心杉做到咁出位，你話冇政治目的？呃鬼食豆腐啦！至於「好打得」嘅林鄭月娥，近日被記者問到是否會更上層樓，佢冇以前咁口響話返英國享天倫之樂矣，只係顧左右而言他，一時話自己在政府做咗三十七年公職，到時會接受傳媒訪問暢論得失；一時又話「引以為傲」，本屆政府在改善民生工作方面，如何如何「交足行政長官畀佢哋嘅要求」。
講真，本屆高官拉雜成軍居多，外行充內行大有其人，施政有乜可能會立竿見影吖！好似鬍鬚曾做咗咁多年財爺，每年財政報告大同小異，加加減減，搬上填下，移下補上，幾乎牛頭角順嫂都知乜料，唔怪得被葉劉批評佢做咗九年財爺「九年如一日」，有錢唔識花，只贏得「守財奴」三字，的確有道理。
至於林鄭，一味自我臉上貼金，本屆政府「重中之重」的房屋政策交白卷，公屋輪候冊等上樓等到變長頸鹿依然上唔到樓，只好繼續住劏房捱貴租；講到扶貧，表面好似做咗N咁多嘢，之不過貧窮人口絲毫無減，「交足功課」，自欺欺人而已。其實，佢官到無求膽自大，天堂又留咗位畀佢，照計應該見好就收，如今卻又晒出陳年舊相，證明自己都有「習握手」，不讓鬍鬚曾獨自風騷。都話權力是最強烈的催情劑，基辛格呢句確係政壇至理名言。