政情：劉文文「機器壞」 變番四眼
好多人都貪靚戴隱形眼鏡返工，尤其係名人出席公開場合更分分鐘戴足全日，但隱形眼鏡戴得耐，雙眼好容易會變得乾澀同攰，長時間佩戴仲可能損害雙眼，以後都戴唔到添！早幾日我哋見到香港吸煙與健康委員會前主席劉文文（Lisa）及現任副主席伍婉婷，平日一向戴開隱形眼鏡嘅Lisa，呢期頻頻以四眼Look現身，唔通佢想轉新形象？
伍婉婷打泰拳健身
話說Lisa已經戴咗隱形眼鏡好多年，但戴隱形眼鏡有壽命，佢就話早前開始發覺戴隱形眼鏡時好唔舒服，仲笑言因為「機器壞」所以要乖乖哋轉番戴眼鏡喎。不過，佢一向貪靚，就算戴眼鏡都一啲唔老土，當日佢就戴咗副依家好興嘅極幼金屬配玳瑁色膠框文青眼鏡，襯埋佢個清爽短髮，睇睇吓仲多咗兩分青春氣息。
至於身旁嘅伍婉婷同樣係愛靚之人，近期積極勤練泰拳健身，話就算幾忙，都會一星期抽一至兩日做運動喎，難怪身形睇落愈來愈弗。