政情：史泰祖辭職 打機攝時間
皮膚科醫生史泰祖因早前建議以公投決定醫務委員會內七名醫學會代表嘅選舉辦法，結果被醫學會會董鬧爆，繼而劈炮辭去醫學會會長一職。日前我哋喺一個活動上見到史泰祖，佢話過往做會長時，行事曆日日都排滿密密麻麻嘅會議，依家唔使開會一身輕，可以打網球、行鴨寮街同打機，用嚟填補空虛喎。
嘆醫學政治太複雜
被問到有無後悔辭任醫學會會長，史泰祖引用咗《雙城記》最後一句：「It's a far, far better thing that I do, than I have ever done」，即係話佢做咗一件事係咁耐以來做得最好嘅。佢又話，醫學本身已經複雜，估唔到醫學政治仲複雜，所以唔想再涉足呢個範疇，只係想做一啲正常人會做嘅事，例如係打機、行街買嘢等。
既然依家多咗咁多時間，史泰祖又會唔會有興趣做其他公職呢？佢就話目前只係器官捐贈推廣委員會成員，暫時未有其他人接觸佢。講開器官捐贈，佢話器官死咗就係廢物，但器官捐贈仲未被社會大眾廣泛接受，所以仍要多加努力。