政府前日公布，今年首季本港經濟增長只有百分之零點八，但財經事務及庫務局局長陳家強尋日出席電台節目時就話，香港經濟經過多年擴張，今年增長放緩實屬意料之內，有關數字唔算特別差喎。
對於部分泛民議員同本土派人士，反對中港經濟融合及反對香港參與「一帶一路」建設，陳家強強調，經濟融合係全球大趨勢，香港亦一向崇尚自由經濟貿易，認為提倡「閂埋門」嘅先唔係香港人，喺香港宣傳唔要融合嘅人要去「驗吓個腦」，並呼籲市民唔好畀呢啲政治爭拗「搞壞個腦」。
陳家強又話，喺經濟增長減慢下，政府開支就係支撐經濟嘅動力，但立法會拉布就阻慢咗好多政府工程。對於今年財政預算案嘅三讀通過日期比過去三年早咗，反映拉布效力正不斷減弱，陳家強就憶述過往沒有拉布嘅日子，預算案一般可以喺四月底通過，今年五月中通過仍然係退步，批評拉布議員嘅發言不着邊際，反而令議會喪失咗監察政府嘅功能。
卓妮