中環出更：譚公誕又「遇襲」葉劉淡定應對
行政會議成員兼立法會議員葉劉淑儀（葉劉）去年大年初二出席沙田車公廟求籤活動時，慘被舞麒麟撞飛，事隔一年幾，尋日佢就轉戰筲箕灣，出席譚公誕賀誕典禮。雖然經一事、長一智，葉劉全程都小心謹慎，但係最後都係難逃被「襲擊」命運，佢喺接受現場傳媒訪問時，被巨型旗幟拂中塊面。不過，對於突如其來嘅「襲擊」，葉劉都只係厲咗一眼，然後繼續淡定接受訪問，EQ都算唔錯。
葉劉唔知係咪擔心再次企錯位，尋日一到活動現場就箭步行到大會安排嘅嘉賓席坐定定，又四處張望，警覺性甚高，之後為舞獅進行簪金花掛紅儀式時，更加係動作迅速，完成後未等其他嘉賓停手就立即返回座位。卓妮問葉劉係咪擔心再被撞親，佢就自嘲係「大鄉里」，之前只參加過長洲飄色巡遊，今次係佢第一次睇譚公誕節慶，覺得好大規模、好隆重，因為有好多人參與儀式，所以先快手快腳，絕對無陰影喎。
雖然如此，葉劉都係避免唔到被「襲擊」，佢喺活動後接受訪問時，有一男子手持一面大型藍色旗幟經過，唔小心拂中葉太塊面，但呢位男子並無停低，應該對「施襲」不知情。葉劉就擰轉頭厲咗一眼，但好快就繼續回答傳媒提問喇。
小朋友跳梅花樁顯功架
卓妮仲見到立法會議員王國興及鍾樹根，對於現場一班小朋友嘅舞龍獅表演，王國興就大讚佢哋嘅梅花樁跳躍動作好有功架，仲話舞獅尾其實係難過舞獅頭，因為要配合前面獅頭嘅動作。尋日活動仲有飄色巡遊，扮譚公嘅小朋友原來係鍾樹根朋友個仔，樹根話揀小朋友扮譚公，最緊要係揀個靚仔又唔怕醜嘅，又話自己每年都會出席譚公誕，認為咁先至係撐本土喎。
卓妮