相傳神燈賜人三個願望，有人話只要許願「要無限個願望」，咁咪發達咯。功夫茶冇咁貪心，但求南亞人蛇消失，假難民絕迹，以後唔使再寫文鬧呢班瘟神，咁就心滿意足嘞！
可能有人會問，功夫茶三日唔埋兩日就鬧假難民禍港，情節似曾相識，唔悶嘅咩？其實功夫茶同大家一樣，聽到「假難民」三個字唔單止懨悶，直頭想作嘔。不過冇符喇，南亞兵團禍港殃民，作為第四權嘅傳媒踢爆亂象責無旁貸，功夫茶忍無可忍，只能一次又一次拍案而起。呢，就前日之嘛，一日之內就發生多宗涉及南亞兵團嘅案件，偷渡有之，斬人有之，元朗一名九十後男子更遭三名南亞匪從後以硬物扑頭搶手機，而今次已經係該區三個月以來第三宗同類案件，都咪話唔得人驚。
咪以為南亞兵團犯案手法只係新瓶舊酒吖，大家有眼見，佢哋氣燄愈來愈囂張，手法愈來愈兇殘，最近更採用所謂「狼群戰術」，專喺深夜時分聯群結隊圍劫獨行男女，簡直防不勝防。以往賊人淨係求財，受害人乖乖就範小命可保；家陣歹徒為免被點相，往往直接扑頭快閃。謀財分分鐘變害命，難怪元朗等區居民人心惶惶，聞假難民色變，紛紛組織更練團自保喇！
點解南亞兵團有恃無恐？咪因為警方滅罪無能，兵賊難分囉。第樣唔講，喺背後操控假難民嘅本地黑勢力，幕後主腦至今仍然逍遙法外，話冇高層包庇，幼稚園小朋友都唔信喇。最慘係上樑不正下樑歪，有人涉嫌監守自盜偷保釋金，有人捲入影裙底春風化案，有人更偷影女鞋自瀆添，旨意佢哋除暴安良，蚊都瞓蛇都死喇！
警方固然靠唔住，港府更加食塞米。民意強烈要求設立禁閉式難民營，本來有助解決問題，奈何當局推三阻四；至於退出聯合國難民公約咯喎，更加提都唔敢提，加上司法機構鬼咁仁慈，時不時巨款禮送假難民回鄉，「難民港」個朵想唔響都難。
當年孟子話「予豈好辯哉，予不得已也。」春秋戰國時代禮崩樂壞，世風日下，孟子惟有企出嚟捍衞正道，正如功夫茶今日頻頻鬧爆假難民亂象，都係唔想眼白白睇住香港死啫。可惜吖，好心冇好報，有所謂人權組織竟然指摘本報種族歧視，「抹黑」假難民，仲燒報紙洩憤添。其實假難民禍港殃民證據確鑿，吟詩都吟唔甩，呢班人偏偏幫佢哋呼冤，點止係反智，直頭係認賊作父，打壓新聞同編輯自由，唔搞死香港唔罷休！
所以話，國之將亡，必有妖孽，今日香港是非錯亂，黑白顛倒，惡有善報，善有惡報，功夫茶想願望成真，睇怕都要靠神燈至得咯！