中環出更:區議員:建龕場應問准先人

香港寸金尺土,唔好話住屋問題,就連骨灰龕位都供不應求。政府打算喺沙田石門興建骨灰龕場,由於沙田人口密集,有人支持亦有人反對。日前沙田區議會轄下衞生及環境委員會討論石門建骨灰龕場一事,當區區議員梁家輝就批評政府將生人同死人撈埋一齊,質疑當局有冇了解過生人感受?事前有冇諮詢過先人意見?仲叫自稱「真係見到鬼」嘅沙田區議員莫錦貴做溝通橋樑添!

梁家輝尋日就話,佢之前曾經去過蓬瀛仙館嘅活動,聽聞該館夜晚唔會搞活動,因為係「人哋」活動嘅時間,呢個「人哋」當然就係講緊啲先人啦,所以佢先認為在生有在生嘅生活,先人有先人嘅生活,唔應該喺鬧市起骨灰龕場,將生同死撈埋一齊。

莫錦貴自爆撞鬼

而莫錦貴當日開會時就自爆真係見到鬼,仲話見過啲鬼喺棺材舖個個企喺度發呆,其實做鬼好慘,覺得無論邊度起骨灰龕場都有人反對,當局應盡量回應居民訴求改善方案。

梁家輝又話,雖然有關建議最終都係通過咗,但佢都會繼續關注,仲講笑話自己睇唔到鬼,可能要請莫錦貴做橋樑喎。

卓妮

第一手消息請下載on.cc東網iPhone/iPad/Android/Windows Phone Apps