美容同醫療係兩種完全唔同嘅概念，大纜都扯唔埋，偏偏有人以美容為藉口，提供另類治癌療程，而港府又闊佬懶理，關人個關，卒之又搞出人命。
呢間攞命美容院宣稱可以透過「活化大腦」及佩戴磁石、吸氧氣等方法，唔使食藥就可以治療癌症、濕疹及情緒病等，講到玄乎其玄，神乎其神，結果唔少人誤墮陷阱，最少有七名病人報案，共涉款五百萬元，其中兩人喺接受療程期間病逝添。當局賊過興兵，以涉嫌串謀行騙罪拘捕女負責人及十名女職員，可惜已經無法挽回受害者嘅損失，更無法挽回兩條枉死嘅人命。
所以話，今時今日無奇不有，明明掛美容院招牌，居然幫人「治療」癌症，當局究竟點樣監管（口架）？最離譜嘅係，美容院聲稱係自然療法，要求病人不可服食其他藥物及接受其他治療，你話係咪靠害吖？係人都知，病向淺中醫，癌症必須及早治療至可以防止病毒擴散，呢間美容院居然阻止病人接受正常治療，唔搞出人命至奇喇。老實講，呢啲唔止係謀財，簡直就係害命。
正所謂，綿綿不絕，必有亂結。近年美容行業亂象叢生，唔少美容院掛羊頭賣狗肉，打針、抽脂早就見怪不怪，家陣仲發展到聲稱可以治療癌症，都咪話唔誇張。四年前有美容中心發生毒血針事故，導致一死三傷，暴露醫學美容無王管嘅問題，當局事後煞有介事成立委員會檢討一番，而且推出一連串指引，建議將醫療及美容分開，點知美容事故唔止冇減少，反而變本加厲，證明所謂嘅指引得個睇字。
正如醫學界人士話齋，港府對「另類療法」零監管，有關療程及技師既唔使註冊，亦唔需要專業資格，唔怪得七國咁亂喇。好似今次事件咁，呢位女負責人曾涉嫌未經註冊執業而被捕，但仍然可以打開門口做生意，而且涉嫌謀財害命，你話當局有冇監管吖？官不殺伯仁，伯仁因官而死，今次兩名病人枉死，美容院固然有責任，而港府監管不力一樣難辭其咎。
見微知著，當局對美容行業放任自流，今次事件只係冰山一角咋。本報早前踢爆有美容院提供屬於醫療行為嘅漂牙服務，明顯借灰色地帶博懵，部分美容院為咗令漂白效果更快更持久，仲採用超高濃度漂白劑，結果對牙齒及牙肉造成永久傷害，美容變毀容，問你怕未。
講到底，港府敷衍塞責，得過且過，搞到成個美容業好似無王管咁，正係事故不斷嘅主要原因。人哋話見到棺材流眼淚，而港產官僚就永遠無知無覺，旨意佢哋監管美容業，不如自求多福好過！