政情：黑英夫妻赴台學復耕
機場日日都人山人海，日前竟然畀我哋「捕獲」天文台前台長林超英（黑英）兩公婆。出遊去邊度玩？一半半喇，唔淨係玩嘅，仲有任務在身，話要去台灣北部貢寮，考察當地復耕嘅水梯田，睇吓人哋點樣做到同大自然協調喎。
睇水梯田做乜？事關黑英係積極為荔枝窩透過復耕去復村嘅背後推手，而喺佢同村民等多方合作下，吸引咗一班青年人同移民海外嘅村民返港一齊攞起泥耙、鋤頭翻土，用有機方法種水稻，一條荒廢嘅客家村喺兩年間變得朝氣勃勃。黑英話，喺復耕呢方面嘅工作唔可以土法煉鋼，要周圍參觀吓，而今次台灣之行會去足六日添！
黑英七十年代去過荔枝窩，對當地景色同呢條具四百幾年歷史嘅客家村念念不忘，所以依家見到荔枝窩嘅進展略有成績好開心，而日前佢就同一班志同道合人士，參加咗荔枝窩復耕初階段成功開展嘅慶祝活動，跟住就飛台灣考察嘞！