政情：為美容業出頭 EQ申報「娘心」
美容業屬於批發零售界，而從業員就屬於勞工界，但近日立法會新界東直選議員葛珮帆（EQ）就聯同批發零售界議員方剛，一齊協助美容業人士，莫非EQ想撈過界？原來EQ為美容業出頭都有段古，她好熟悉美容業，因為葛媽媽都係開設美容院！不過，EQ媽媽只是開設家庭式美容院，所以EQ可以話美容業養大，但她強調每次喺立法會發言都有申報利益。
EQ自爆，她在單親家庭長大，媽媽係一個女人仔，本來只係做家庭主婦，與爸爸分開後毫無謀生能力，於是就去咗做美容學徒，之後慢慢成為美容師，後來捱到開設美容院添！不過，EQ一直未能到美容院幫手，因為做美容要有專業知識，但她去做facial（美容）就免費喇。她笑指自己天生皮膚好，又唔食煎炸食物，又唔食肉類，所以無需要做facial，只係試過去雀斑啫！
質疑政府偏幫有醫生美容院
現時唔少美容院都設有彩光機等儀器，EQ話，如果只准醫生使用，美容院就難以生存。其實不少發生美容事故的美容院，都係標榜醫學美容，亦會由醫生做美容，但就發生美容醫療事故，搞到政府話要規管，但又偏幫醫生，真係本末倒置，害咗無醫生的家庭式美容院。
EQ又話，依家全港約有七萬名美容從業員，很多美容從業員好像她的媽媽般並非高學識，所以這行幫助咗好多基層女性，其實美容業界都認同好高風險嘅美容療程留畀醫生做，但無理由低風險都唔准美容院做，建議政府如果想解決問題，應該設立美容業監管局，以監察及幫助業界，就算唔想幫手，都唔應該倒米囉！
力撐業界「非掠水唔係斬客」
她強調，自己好關注消費者權益，亦處理過好多受美容院騙案，認同應設立冷靜期，其實大部分業界都並非「掠水」，亦唔認同行家「斬客」，擔心會影響業界名聲，政府應該了解美容業界的聲音，切勿矯枉過正扼殺行業生存空間。