中環出更：張宇人打羽毛球周身傷
做運動有益身心，但唔小心亦好容易受傷。立法會飲食界議員張宇人（Tommy）由細到大都鍾意打羽毛球，細個仲係校隊添，仲試過畢業後回母校，帶住羽毛球校隊贏比賽，到依家已經打咗半個世紀，仲會維持每星期同班老朋友打一次波，聽落都相當健康，但原來佢打羽毛球打到周身傷，再係咁真係手尾長。
最驚針灸膝頭
Tommy話，佢打羽毛球好容易拉傷腰背兩條肌肉，要去做針灸治療，其後又試過右邊膝頭、大腿肌肉、小腿等位置勞損或受傷。佢解釋，因為打羽毛球不時要右腳出力，自己又年紀大，所以就出事嘞，依家都不時要做相關嘅運動鍛煉，強化肌肉。
Tommy又話，由十年、八年前開始，有時會針灸治療身上損傷，但至今依然有少少驚，特別係針灸膝頭嘅時候，因為望住啲針喎，加上有人話經常針灸唔係咁好，所以佢都唔敢成日針灸。講起自己嘅病痛，Tommy就好感嘆叫大家真係要珍惜後生。
卓妮