政情：公民講場：醫學會風波 阿祖「堅」嗌交

本報日前率先報道醫學會前會長史泰祖提出改變醫學會選出七名醫委會委員嘅方式，建議由醫學會成員公投決定，結果惹來會董不滿，更傳出有會董要求佢「執包袱」，最終佢自行「了斷」辭去會長一職。呢場公投風波，由隔空罵戰發展到尋日喺電台節目大氣電波上演，史泰祖自稱係被迫辭職，不滿有會董公開要求佢「執包袱」。不過，同場嘅會董蔡堅就反駁係史泰祖將公投事先張揚，將會董擺上枱，又話若大部分會董持反對意見，會長就不應堅持己見。史泰祖辭職無耐，醫學會效率奇快更新咗網頁上會董會架構資料，會長職務改由副會長陳以誠及周伯展代理。