政情：游蕙禎晒出世紙證「香港製造」
繼本土民主前線（本民前）梁天琦被踢爆並非香港出生，有「四眼哥哥」之稱嘅熱血公民成員鄭錦滿亦自爆同梁天琦同樣出生於內地，令本土派掀起一輪起底潮。最新燒到青年新政靚女游蕙禎身上，被本土派要求交代身世，而佢就喺社交網站上載出世紙，力證自己係「香港製造」、土生土長嘅香港人。
被何志光點名挑機
根據游蕙禎嘅出世紙顯示，佢於一九九一年五月六日喺聖德肋撒醫院出生，父親係公務員，任職技術員。游蕙禎更喺網上留言，話對一個地方願意付出幾多，從來都唔係由身份證上嘅英文字母或DNA量化，假若佢喺外地出生而喺香港長大，同樣都會愛上香港喎。
今次向游蕙禎挑機嘅係本土力量何志光，佢喺社交網站留言批評梁天琦以單程證來港，但又攻擊單程證制度，認為政治人物出生地係重要議題，應公開交代。被佢點名要求交代嘅仲有熱血公民成員鄭松泰，唔知鄭松泰會唔會學游蕙禎公開出世紙呢？