新民主同盟前日議決不會參加佔領中環發起人戴耀廷提倡嘅「雷動計劃」，令計劃幾近摺埋，亦令泛民於立法會超級區議會選舉（超區）難以協調三人出選，攬炒在所難免。有足夠區議員提名參選超區嘅民協，眼見雷動計劃搞唔成，最新想法是提出「魔鬼交易」，願意在超區名單上排街工梁耀忠（阿忠）之後，但新界西直選，街工就要讓路畀民協馮檢基（阿基）排首位。
阿基在去年區議會選舉落敗後，民協已經再無足夠知名度嘅區議員出選超區，但最終都要派出知名度不足嘅深水埗區議員何啟明代表出選。何啟明尋日與傳媒茶敍時透露，雖然一直希望泛民協調超區出選名單，無奈新同盟不願參與，所以要考慮現實。佢直言阿忠曾向民協「借票」參選超區，雖然民協唔會借票予阿忠，但他認為街工同民協路線相近，超區方面可以考慮由阿忠排名單首位，佢排第二。
政界無寶不落，如果何啟明願意排名單第二，意味着有政治交易。阿基已幾可肯定落戶新界西，但會否由阿基排首位，街工第二梯隊黃潤達排第二呢？何啟明就未有否認此可能性，但佢承認一旦落實，或會令希望新老交替嘅選民失望。換句話即係第二、第三梯隊上位遙遙無期，繼續由年逾六十歲嘅阿基同阿忠玩晒囉。