中環出更：蕭國健新作品 助建築師告解
香港建築師學會雙年展基金會及藝發局，早前為第十五屆威尼斯國際建築雙年展香港展覽「建築兵法」舉行記者會，一班香港年輕建築師借用中國經典軍事戰術「三十六計」為主題，表達多種建築概念。卓妮見到總策展人蕭國健嘅作品，係一棟以金屬碌架床製成、模仿密集式住宅大廈，名為「初告解」嘅建築物（左下圖），話任何有需要嘅建築師都可以入去告解。
蕭國健話，建築師使命本應係為大眾構建適合嘅棲身之所，但唔少人就曾經被派遣負責違背原則嘅工程而積下罪咎感。好似香港住宅受地方大小、相關條例及發展商要求等各方面限制，幾乎一式一樣已無風格可言，而建築師要迎合社會要求而保持不被同化就非常困難。
林雲峰談香港畸型住宅
蕭國健透露，同場另一建築師蘇國堅係佢老朋友，當年蘇國堅由新西蘭返港後，一身板仔造型入到一本正經嘅建築師樓好似異類咁，但蘇國堅卻不介意旁人目光同佢做朋友，難怪佢對保持個人風格感受特別深。當日現身嘅仲有香港建築師學會前會長林雲峰、會長吳永順、建築師翁松光、有份設計青年廣場嘅謝錦榮等。
林雲峰話，香港好多住宅設計的確畸形，例如窗戶對住天井等。至於吳永順當日致詞時，將三十六計中部分計謀融入講詞入面，但佢就笑言自己背唔晒三十六計咁多，有啲更加係因為今次展覽先第一次聽到喎！
卓妮