唔知大家仲記唔記得，港珠澳大橋曾被外媒選為世界新七大奇迹之一，事關大橋全長五十公里，落成後將會係全球最長嘅跨海大橋。聽落的確好巴閉嘅，可惜吖，香港自己唔爭氣，大橋工程嚴重延誤及超支不特止，仲搞到飄移再飄移，奇迹就冇份嘞，醜聞多多就肯定世界第一。
嗱，港珠澳大橋醜聞愈揭愈多，愈揭愈臭，繼去年被揭人工島飄移七米後，近日又爆出人工島疑因貪快趕工而再度移位近三米。最弊嘅係，飄移問題引起連鎖效應，連帶其他工程都受阻，其中屯門至赤鱲角連接路隧道就因為無法接駁到人工島而一度停工。路政署仍然死撐以一七年通車為目標，但官僚靠得住，豬乸會上樹，咁搞法，隨時延至一九年都未必通到車，成本肯定不斷上漲，都唔知點收科。
大家都知，港珠澳大橋本來已經嚴重超支，當局出盡九牛二虎之力先至獲立法會通過追加撥款，如果工程再次超支，要立法會開綠燈恐怕難過登天。再講吖，大橋工程原本已接獲九十宗承建商申索個案，萬一證實人工島移位係當局出錯所致，索償官司肯定陸續有來，港府唔頭痕就假。正如「東方報業民意調查」顯示，大部分受訪者直斥工程開支淪為無底洞，最終又要市民埋單，簡直冤哉枉也。
其實，早喺舊年四月，已有知情者踢爆路政署為求趕工，將原本分層堆壓填海方式改為「直接吹沙」，大幅縮短填泥固結時間，結果欲速則不達，最終搞到人工島不斷飄移，唔衰攞嚟衰。講到尾，如果港產官僚唔係無心無肺，無監無管，又點會將堂堂國家級工程變成今日嘅爛攤子吖？受訪者就講得啱嘞，港府監督工作存在漏洞，出咗事就淨係識得用公帑補鑊，結果一事無成，影衰香港之餘，仲拖累珠海同澳門，正一佗衰家。
無錯嘞，大橋工程一波三折，損失嘅點止金錢咁簡單吖。係人都知，大橋內地段工程已經進入尾聲，好快就可以通車，澳門段亦完成得七七八八，反觀香港段不斷出事，鑊鑊新鮮鑊鑊甘，內地段竣工在望而香港段通車無期，如此「半橋」奇觀，想唔淪為國際笑柄都幾難。
講起就唏噓，以前香港製造係質素嘅保證，家陣變成烏龍百出嘅代名詞，港珠澳大橋只係冰山一角咋，好似高鐵工程咁吖，同樣係跨境工程，同樣係香港拖內地後腿，高鐵深圳至廣州段一早通車，比香港段長但成本仲低過香港添。一節見則百節知，愈來愈多人話香港呢一制比唔上內地嗰一制，真係唔到你唔認o架。