政情：公民講場：本土派互插 人鬼難分

尋日係五一假期，北區水貨客關注組聯同幾個本土派組織就趁機再搞番名為「光復」嘅反水貨客行動，但喺行動前夕，有「國師」之稱嘅香港復興會主席陳雲就喺網上呼籲支持者唔好參與，仲批評呢次光復行動係「天仙局」，同埋鬧參與行動嘅人「蠢過隻豬」，事關依家來港旅客人數已大減，本土派人士再搞「光復」就要背負妨害香港經濟嘅污名。另一邊廂，關注組召集人梁金成（金金）就喺活動開始後冇耐臨時宣布取消，原因係聲稱收到訊息，指活動被「建國派」滲透，擔心會有混亂，對參與人士構成危險。陳雲其後喺網上再度發功，指其實係自己「救咗金金」，仲話對方唔領情。雖然兩人都係本土派人士，但大家各執一詞，都分唔清邊個係人邊個係鬼喇！