政情：欽點林卓廷 白鴿爆內戰
立法會選舉將喺九月舉行，而民主黨（白鴿黨）喺選舉部署上又爆內訌。據聞有黨員不滿黨內「欽點」總幹事林卓廷接任新界東立法會議員席位，早前大鬧會員大會，力數林卓廷「受薪出選」、「戀棧權位」嘅罪狀，並要求林即時辭任總幹事一職。林接受查詢時否認戀棧權位，又話自己目前係停薪留職，一切都係由黨中委會決定，但解釋似乎未獲接受，有黨員表明會去信黨中委會要求處理事件。唔通要推翻出選結果先肯收手？
白鴿黨上周日公布立法會出選推薦名單，林卓廷獲超過九成出席會員大會嘅會員支持，預料代表白鴿黨出戰新東選區。但呢個結果似乎令有份參與黨內初選嘅大埔區議員區鎮樺好不滿。據了解，區鎮樺喺會員大會上力數林卓廷不是，批評白鴿黨「欽點」佢接任對其他人唔公平，又質疑林卓廷一直只係掛名做總幹事，只係參與選舉而無處理黨內事務。
新東成員掟水樽被逐
據聞當時區鎮樺亦有質問林卓廷停薪留職嘅決定，係為自己留後路，若不幸落選就可以重任總幹事。佢當時要求林辭任總幹事，交由全職、沒有公職嘅人出任，以證自己並唔係戀棧權位。區鎮樺質問林卓廷之後，又有兩個新東支部嘅成員繼續就同一議題發言，其中一人疑不滿林卓廷嘅回應，掟水樽洩憤，被趕出場外。
區鎮樺稱應主動辭職
林卓廷接受查詢時解釋，停薪留職係黨內中委會嘅決定，佢作為「打工仔」表示認同及接受，強調自己並非受薪出選。佢又話自己早前參與區議會選舉時，中委會亦以相同嘅方式作處理。該黨副主席羅健熙尋日亦有幫手解畫，指林卓廷一月中已開始停薪留職，中委會已將選舉統籌職務交由佢同黎敬瑋代行。
區鎮樺尋日接受查詢時，承認曾喺會員大會上力數林卓廷。佢再斥林不負責任，交個波畀中委會，又覺得林應該主動辭職，仲話會再去信黨中委會要求重新處理林嘅職務問題。爭奪黨內提名已經搞到「擘面」收場，愈近選舉相信鬼打鬼嘅情況只會愈嚟愈多。