中環出更：被斥「自閹」醫學會 史泰祖劈炮
本報尋日率先報道醫學會爆內訌，醫學會會長史泰祖日前建議以公投決定醫務委員會七個議席嘅選舉辦法，畀其他會董鬧爆。尋日情況急轉直下，史泰祖心知方案不獲會董支持，尋日凌晨突發電郵畀各會員宣布「劈炮唔撈」。其他會董隨即喺尋日下晝召開緊急大會，決定由兩位副會長暫代會長職務。會董之一嘅醫學會前會長蔡堅仲語帶雙關咁話，今次事件只會令醫學會更加「團結」。
史泰祖喺電郵中指自己對公投方案嘅意見，與其他人存在嚴重同不可挽回嘅分歧。佢尋日接受訪問時晦氣咁話：「之前有傳話想叫我執包袱吖嘛，咁我留o係度都無意思啦！」
會方「感到遺憾」
其實史泰祖本身仲有兩個月就卸任，雖然醫學會尋日喺會後話對史嘅提早離任「感到遺憾」，但轉個頭就批評史嘅公投方案欠深思熟慮，仲強調無人叫史執包袱走。
副會長周伯展指現階段冇公投必要，再三強調會董選出嚟嘅委員係好民主。
卓妮