闊別半世紀 母女終重逢
【本報訊】女子尋母十年，母親節前夕如願。「有啲陌生，但又好親嘅感覺。」這是六十八歲楊慶珍相隔近半世紀後，重遇生母的第一個感覺，既矛盾，又感恩。已移居美國多年的她，一月初透過紅十字會及媒體協助，初步成功配對，三月再經基因測試確認母女關係。為了盡快母女相認，上月即來港冀與母度過首個母親節。
四月大遭送走 養母照顧
楊慶珍四個月大時被送往佛堂，自此由養母養大。六十年代末，當時就讀中學的她曾有機會與生母重聚，但她卻沒有珍惜：「有一日我返學時，突然有個人出現話『我係你媽媽』，我喺完全冇準備嘅情況下唔識諗，叫佢以後唔好嚟搵我。」她憶述生母帶備湯水前來相見，卻遭她婉拒時，一臉尷尬：「我當時話成日都有湯飲，唔使喇。」坐在身旁、年近九旬的楊母曾影卻說：「唔會唔開心，佢有自由嘛。」
一個電話號碼 重燃希望
隨着年紀漸長，楊心態有變，開始體諒父母當年經濟有困難，才迫不得已將她交給養母照顧。約十年前起，她求助於紅十字會尋人服務，個案一度終結，直至前年她在舊物中找到一個疑似生母的電話號碼，個案才重啟。
經歷失而復得，楊對生母心存感激：「好多謝佢，如果唔係佢將我畀其他人，我可能唔存在喺呢個世界。」