政情:設侵權黑名單 政府唔願郁

《二○一四年版權(修訂)條例》(版權條例)早前喺立法會被泛民主派拉布拉倒,令香港喺保護版權方面無寸進。最近美國貿易代表署發表嘅「特別301報告」都促請香港要處理猖獗嘅網上盜版問題。原來一眾版權持有人已經密謀設立網上侵權嘅黑名單,仲就設立黑名單一事同政府會面,不過政府就同當初要修訂版權條例一樣,都係歎慢板,你急佢唔急。

話說版權條例修訂不成,對於被侵權幾近忍無可忍嘅一班版權持有人就打算採取法律行動,控告侵權者。不過,打官司始終要消耗大量人力物力,件事就不了了之。而一眾版權持有人原來另有打算,就係希望政府能夠倣效外國,設立網上侵權黑名單,列出經常被投訴涉侵權嘅網站,並藉此呼籲廣告商唔好喺呢啲網落廣告。

不過,政府拒絕咁做,原因係網站被投訴侵權唔代表真係侵權,除非真係被定罪,政府先有理據將有關網站列入黑名單。睇嚟班版權持有人要爭取權益都要靠業界自求多福喇。

第一手消息請下載on.cc東網iPhone/iPad/Android/Windows Phone Apps