政情：黃成智「被飛」 記者會冇影
標榜走中間路線嘅政黨「新思維」，尋日公布九月立法會選舉各區選舉統籌。該黨主席狄志遠（Dick）、副主席鄭承隆、廖添誠及秘書長黃俊瑯分別擔任九龍西、新界西、新界東及九龍東選區嘅選舉統籌，而四人早前亦已在黨內報名出戰有關選區，但正式名單仍有待落實。今次選舉統籌名單，進一步確定二月代表該黨出選立法會新界東補選並慘敗嘅黃成智被「飛起」，成智連尋日記者會都無出席。
狄志遠否認曾勸退
對於成智未有出席，Dick就解釋係因為成智近日家中有事，至於不在選舉統籌名單之內，佢就話純粹係成智嘅個人決定，否認「勸退」成智。佢仲笑笑口話，雖然佢哋四個分別來自不同政黨，但並非棄將或叛徒，係反映新思維政治光譜闊大，只要認同第三路線都會容納。佢哋四人以各人名字組成「俊志承誠」組合，望能「眾志成城」，做好選舉工作，而該黨將於本月十四日舉行步行籌款，以籌集資金參選。
