中環出更：座駕違泊 肥佬黎歎「牛肉乾」
被指是違法佔領行動幕後黑手的壹傳媒集團前主席黎智英（肥佬黎），被警方預約拘捕後至今仍未「落鑊」，但尋日佢又因其座駕涉違例停泊等候而被抄牌。尋日中午，肥佬黎乘坐由司機駕駛的房車到中環，其司機泊車等候肥佬黎離開期間，被交通督導員勸喻駛離，但其座駕駛離後無耐又再折返，結果「斷正」被抄牌，罰款三百二十元。不知肥佬黎涉嫌在佔領行動期間組織及參與非法集會兩項控罪又幾時「落鑊」呢？
被驅趕後又駛回
尋日中午十二時許，肥佬黎乘座駕到中環歷山大廈落車，估計是同屋企人午膳。肥佬黎落車後，其司機就將座駕駛走，直至近一時半先再返回歷山大廈，停泊在大廈外面，於是被交通督導員上前驅趕，因為該處只可以上落客，不可以長期停泊等候，以免阻礙其他道路使用者。肥佬黎司機隨即將座駕駛走，但無耐又再折返停泊在歷山大廈外，結果難逃抄牌命運，而肥佬黎就在抄牌後才施施然現身上車。食完飯再食「牛肉乾」，不知肥佬黎會否食到滯呢？
卓妮