中環出更：管理秘笈 企業家融入新世代
香港管理專業協會企業管理發展中心日前舉行周年晚會，講起管理方法，主席陳裕光就話一定要緊貼時代轉變，事關幾年後無可避免公司大部分員工都會係新世代，即八、九十後，所以作為管理層亦必須融入無得逃避。作為年輕新一代的「洗樓王」創辦人王嘉源及生蠔供應商Ocean three創辦人何智聰就認為，增加員工歸屬感最為重要。
現時唔少打工仔都係透過WhatsApp等智能手機通訊程式與老闆溝通或請假，陳裕光認為可以接受，佢就話現時九成時間都係以WhatsApp與同事溝通，夠晒方便快捷，反而電郵就愈來愈少，只佔一成。佢仲知道時下打工仔唔鍾意老闆半夜來電，所以平日都會盡可能避免咁做。
王嘉源薪高糧準留員工
王嘉源就話，佢哋行業管理困難係初期流失率好大，兼職同事多，但經歷幾年時間後，要走嘅都走晒，留低嘅員工相當穩定。佢會為同事慶祝生日，並定期舉辦公司聚餐，等同事多啲交流。不過，講到尾，佢哋認為人工高及出糧準時係員工留低其中一個好重要嘅因素。
同場仲有盈健醫療主席陳健平、粵劇名伶梁醒波孫仔梁智宏等。陳健平話，醫生學習能力高，只要幾個醫生聚埋一齊自然會互相學習，幾乎無為而治，最緊要派啱適合佢哋嘅區域，發揮所長，流失率就會低。至於梁智宏近期則以港人回憶、鑽石酒家嘅品牌推出即食鮑魚等小食，將港人回憶以另一形式重現。
卓妮