講就天下無敵，做就有心無力，係港產官僚最大特色。好似推廣電子教科書咁吖，開頭大鑼大鼓，家陣偃旗息鼓，問你服未。
係咁嘅，傳統教科書年年改版，年年加價，引起家長及學生怨聲載道，教育局四年前係威係勢推出「電子教科書市場開拓計劃」，話要打破傳統書商壟斷局面喎。結果又點呢？相關計劃推出兩期，開發咗三十幾套電子書，資助咗五千萬元公帑，可惜市場反應冷淡，本學年只有五十五間小學及八十五間中學選用，僅佔全港小學及中學一成及一成八，簡直慘不忍睹。
更弊嘅係，首期十三間獲批電子書開發機構之中，三間基於商業考慮撤回申請，第二期仲差，八間獲批機構之中三間撤回申請，反應一次冷淡過一次，證明呢個計劃雷大雨小，連書商都意興闌珊。面對此情此景，教育局想唔認衰都唔得，聲稱正評估成效，無意展開新一輪計劃喎。咁即係點吖？即係停止資助，半途而廢囉。
老實講，咁嘅結果一啲都唔令人意外。正如電子教科書協會負責人話齋，當局聲稱協助業界開拓市場，可惜全無軟硬件配合，而且落井下石，話就話撥款九千萬元資助學校提升無線網絡，但又容許獲資助學校使用傳統書商嘅電子教學資源，參加開拓計劃嘅書商反而不獲優先採用。仲有吖，當局兩年前突然反口提早開放電子教科書市場，引入大量競爭，搞到開發商無所適從，只能掙扎求存，想唔半途而廢都幾難。
講到底，工欲善其事，必先利其器。雖然全港近半學校已完成WiFi無線網絡基礎設施工程，但仍然有學校因為設計問題而做唔到無線上網，咁又點樣推行電子教學呢？有立法會議員就講得啱嘞，教育局只着眼於降低教科書價錢，根本冇考慮其他潛在問題，亦未有同業界溝通點樣利用科技提升教學質素，搞到電子書計劃唔湯唔水，唔跪低至奇。
其實，採用電子書話就話係一種潮流，但亦存在唔少問題o架。外國機構一項研究發現，閱讀十分鐘電子書所耗嘅碳使用量，仲多過印刷傳統教科書嘅碳使用量，可見電子書都唔係咁環保啫；另一項調查就發現，外國選用電子書嘅大學生多數中途退出，寧願用番傳統課本。你話嘞，外國電子書都未能普及，港府學人趕時髦，點可能唔撞板呢？
所以話，港產官僚成事不足，敗事有餘，旨意佢哋降低教科書售價，簡直係緣木求魚。呢，電子教科書搞到唔湯唔水，傳統教科書就繼續加價，下學年平均加幅百分之二點三，部分加幅甚至接近一成，呢啲咪就係教育局嘅好帶挈囉！