佔領行動發起人之一、港大法律系副教授戴耀廷早前拋出「雷動計劃」，話希望協調泛民主派候選人，在九月立法會選舉爭取過半數議席。不過，建議一出已經有泛民議員表明地區直選議席不可能協調，至於計劃另一部分，即就「超級區議會」功能界別舉行初選嘅建議，早前亦因為新民主同盟拒絕參與而宣布死亡。
負責協調泛民選舉嘅民主動力及戴耀廷前晚與泛民政黨代表會面，討論超區協調及初選機制。據了解，初選所需費用由每黨二十五萬元降至十萬元，共需七十萬元，泛民政黨預計在五月廿三日簽署初選協議，六月下旬提名，七月正式舉行初選。
不過，其實計劃只係得個傾字，與會嘅新同盟秘書長陸耀文表示新同盟暫不考慮參與雷動計劃初選，認為初選只對於大型政黨有利。他承認，會上有人提出改良方案，但仍然未如理想，認為新同盟唔會在短時間內改變立場。
表明有意出戰超級區議會嘅梁耀忠質疑，初選時間太遲，似乎參與初選嘅意欲不大。除咗街工，其實民主黨一早已經表明，要所有泛民政黨都參與初選，才有實際成效，所以新同盟拒絕參與，即代表民主黨都不會「落水」，看來雷動計劃已名存實亡。